اسمع يا عثل

مرشحي الاعادة علي رئاسة الجمهورية , من اليمين الي اليسار د. محمد مرسي مرشح الاخوان المسلمين و أحمد شفيق رئيس وزراء سابق بنظام مبارك

من فضلك و لو سمحت , ركز معايا:

خلاص الوقت ازف ,و انت ليك رأي.

دقق... و ركز.... و اعرف...  ان في ملايين هاتنتخب مرسي علشان مانرجعش ورا تاني , الملايين دي يقدروا يتجمعوا بسرعة البرق في اي وقت عن طريق الفيس و التويتر و جرايد معارضة  اللي مالهاش عدد و مالهاش كبير يوقفها  النهاردة , و الكل مستني علي غلطة.

ركز تاني...  و افتكر ان مرشح الفلول و النظام القديم شغال نفاق علي ودنه. وعود براقة لأعضاء الحزب البائد من تحت الترابيزة, و وعود كدابة للأخوة المسيحين... لو ركزوا فيها هيلاقوا انه كداب و مفيش حاجة من اللي قالها يقدر يعملها, مش بس كدا دا كمان هاتلاقيه صوفي عند الصوفيين و وطني عند الوطنيين و ثورجي عند الثوريين و مسحراتي في رمضان لو لزم الامر بس تديله صوتك ,

 حتي مداعبة الاحلام علي نفس نسق تفكير النصابيب بالضبط, فهاتلاقية بيداعب احلام الغلابة سائقي التاكس و اصحاب الاقساط بسقوط الدين عنهم , مع العلم ان الحل الوحيد الدستوري و القانوني للموضوع دا هوا انه يدفعها من جيبه , يعني من جيبنا يا عثل. حتي لعيبة الكورة وعدهم.

مش واخد بالك انها نفس السياسة القديمة بالضبط: وعووووووووووود و احلااااااااااااااام و أمااااااااااني , و في الاخر سجن و تعذيب و سمعني احلي اغانيييييييييي.

ركز معلش كمان مرة :

بقالك اكتر من 15 يوم عمال تسمع من اليمين و من الشمال اتهامات من غير دليل (و كدبني لو انا غلطان) و انت في الشغل و علي القهوة و الفيس و تويتر و تاني يوم تلاقي الاتهامات دي... يا سبحان الله , باطلة... و مالهاش اي اساس صحيح, زي اللي بيطالعنا بيها استاذنا الفذ العلامة الفهامة العكش... و الأن بيتسابق معاه في نفس الترهات دي الاخ زهايمر المرشح التائه لرئاسة الجمهورية , و أعوانه من موظفي الدولة القديمة لدي الهيئات السيادية و القضاء اللي " لمؤاخذه" مفروض يبقي نزيه, بس نزيه عمل لجوء في دولة تانية و مش راجع دلوقت.

 عارف هما بيعملوا كدا ليه

علشان يداري علي مصايبهم و يحفظ ليهم و لعيالهم اماكنهم و ياخدوا حقك يا حليوة بصوتك و بمزاجك.

اخر حاجة اقولهالك با عثل:

لو انت عايز ترشح شفيق علشان هوا نزيه اعرف انه نزيه من جيب سعادتك. و لو علشان شريف فلمؤاخذه دا محصلش و موقف الطيارات اللي هوا عامله يشهد بالمقارنة بالمطارات المحترمة التانية اللي ماصرفتش تلت اللي الباشا الشريف صرفه,

و لو عايز تنتخبه علشان كاريزما يبقي انت عثل و مش مركز خااااااالص في اللي بينيله شفيق كل يوم علي التليفزيونات , دا القذافي بتاع مصر با جماعة,

و لو هاتختاره علشان تاريخه يزكيه, يبقي الحلو ماكنش في الدنيا ايام الثورة . و البنبون لسه سيرته مسمعه لحد النهارده.

ها لسه عايز تنتخب شفيق الباشا, صاحب الباشوات , يبقي خلاص استعوضت ربنا في كرامتك و بلدك و ضميرك و مش هامك حساب ربنا ليك

عارف ليه

علشان انت صوتك ( أمانة)

Pr.nairos@gmail.com

http://egyusa.blogspot.com/2012/06/blog-post_14.html